Notisia

Regulashon di tarifanan di kuido dor di Sehos

Geplaatst op 9 Aprel 2019 dor di Ministerio di Salubridat Públiko, Medio Ambiente i Naturalesa

WILLEMSTAD - Tarifanan di kuido di seguro básiko ta basá riba lei di Landsverordening basisverzekering ziektekosten (BVZ) i tarifanan di seguro partikular riba Prijzenlandsverordening:

Tarifa di hòspital i dòkter basá riba seguro básiko ta keda determiná pa GMN
Na aña 2013 gobièrnu a introdusí Landsverordening basisverzekering ziektekosten (P.B. 2013, no. 3), esta seguro básiko. Pa fin di februari 2019 BVZ ta tin 150.855 asegurado ku ta gran parti di e poblashon di Kòrsou. Den e lei di BVZ, a stipulá ku e tarifanan pa e institutonan i personanan ku ta duna servisio den e área di salú pa aseguradonan ta kai bou di responsabilidat di Minister di Salú, Medio Ambiente i Naturalesa. Minister por determiná un budget tambe.

Tarifa di seguro partikular di hòspital i dòkter ta keda determiná pa MEO
Banda di e stipulashon pa ku tarifanan di kuido pa e seguro básiko den e lei di BVZ, na 2013 a stipulá ku e ‘Areglo di Tarifa pa Dòkter di Kas i Spesialista, 1986’ ku ta kai bou responsabilidat di Minister di Desaroyo Ekonómiko (MEO), lo kaduká riba un fecha ku lo keda determiná despues pa medio di un dekreto gubernamental (landsbesluit). E fecha akí a keda stipulá na 2015 den un dekreto gubernamental (P.B. 2015, no. 35).

Konsekuensia di e lei di BVZ di aña 2013 huntu ku e dekreto gubernamental di aña 2015 ta ku e tarifanan pa pashèntnan di dòkter ku no ta kai bou di seguro básiko (BVZ) for di sèptèmber 2015 no ta regulá mas. Ku otro palabra, e merkado ta liber pa e dòkternan i spesialistanan partikular stipulá preis di nan servisio pa e pashèntnan ku seguro partikular, esta ku no ta kai bou di seguro básiko for di 2015. MEO por disidí pa regulá e merkado si interes general ta eksigí un stipulashon di preis máksimo.

Tarifa di seguro partikular pa hòspital ta keda determiná pa MEO
Pa hòspital e dekretonan pa tarifanan pa kuido (AB 2009, no. 68 i AB 2010,no. 28) ku ta trata di preis di kuido ta bálido te ainda. E ta keda na outoridat di Minister di MEO pa disidí si ta nesesario pa stipulá preisnan nobo.

Kon ta sigui
Minister di Salú, Medio Ambiente i Naturalesa ku ta responsabel pa tarifanan basá riba seguro básiko huntu ku Minister di Desaroyo Ekonómiko ku ta responsabel pa tarifanan di seguro partikular, lo sinta mas pronto posibel ku hòspital Sehos pa atendé tantu e tarifanan básiko komo esnan partikular. Den futuro e Zorgautoriteit Curaçao lo regulá preis pa tur tipo di servisio médiko pa ambos tipo di seguro.

Ministerio konserní

Bo opinion