Notisia

Relato Konsulta ku Promé Minister Rhuggenaath 6 ougùstùs 2019

Geplaatst op 6 Ougùstùs 2019 dor di Ministerio di Asuntunan General i Promé Minister

Aki ta sigui un relato di e konsulta ku prensa tabatin ku Promé Minister Rhuggenaath dia 6 di ougùstùs 2019, ku tópiko: ‘Update’ di último desaroyonan.

For di inisio di e seshonnan akí, mi a tuma tempu pa splika kon nos pais a yega na e punto desisivo ku nos ta aworakí i dikon Gobièrnu ta tuma desishonnan ku e mester tuma. Paso esei ta nos tarea prinsipal komo gobernante i mi tarea prinsipal komo lider di e Gabinete aki. Tuma desishon ku bienestar general na mente. Mi por komprondé dikon nos mester splika pa nos haña komprenshon pa nos desishonnan. P’esei nos ta keda splika dikon. Nos lo sigui splika dikon, pa tur hende i grupo ku ta interesá.

Den siman ku a pasa ei mi a topa 3 bes ku representantenan di Solaridat Sindikal. Den último simannan mi a sinta tambe ku representantenan di otro sindikatonan, mi a topa ku invershonistanan, mi a topa ku empresarionan, mi a topa ku asosiashonnan di sektor privá, mi a topa ku periodistanan, mi a sinta ku organisashonan sosial, i mi a sinta ku representante di iglesianan i diferente denominashon. Pronto lo mi sinta ku maestro- i hóbennan.

Mi a hasta invitá lidernan di frakshon di oposishon, pa nos kombersá riba kiko si ta nan ideanan, pero mi a risibí un ‘no danki’ riba mi invitashon. Ami ta tene enkuentronan riba base regular, pero tambe tin un proseso di Diálogo Nashonal tripartit instituí pa un protokòl segun normanan internashonal. Ministernan di Gabinete Rhuggenaath tei regularmente na e seshonnan.

Banda di e diálogonan informal i e diálogonan formal, nos a kuminsá un proseso di konsulta nashonal pa tambe skucha i kompilá ideanan, proposishonnan i otro sugerensianan. Mi tin di bisa ku dor di e enkuentronan, ya tin diferente prioridat kaminda Gobièrnu ta bai traha huntu ku stakeholders pa detayá kon nos ta bai implementá e strategia ku nos a delineá. Den e strategia di kresementu, di kual riba algun tópiko nos a sera un akuerdo tambe pa kolaborá ku Hulanda, ta awor ta e ora pa huntu nos bai duna kontenido.

Nos ta bai traha mas intensivamente ku CHATA kon nos por kobra mas na room tax pa “level playing field’ i tambe na un outoridat di turismo. Basá riba e proposishon “Sembra awe, kosechá mañan’, nos lo bai inventarisá huntu ku Kámara di Komèrsio pasonan pa aselerá un mihó konekshon entre merkado laboral ku enseñansa. Tambe nan lo bini ku nan proposishonnan pa e agènda di invershon pa boost trabou. Nos a tuma desishon riba esaki den Konseho di Minister.

Asina ei tambe for di un siudadano profeshonal, nos a haña un proposishon ku yama “Reforsá Kòrsou”. E persona akí tambe a papia ku diferente stakeholders inkluso sindikantonan pa haña input. Aworaki partinan di e plan nos lo bai aliniá ku implementashon, ku sosten di e persona.  Ku nos lo inkluí partinan di plan “Reforsá Kòrsou” den groeistrategie tambe ta un desishon ku nos a pasa den Konseho di Minister. Pues mi ta para tras di e palabranan ku a sali ayera ‘front page’ den korant; Gobièrnu ta habrí pa input, pasó no ta tur kos òf tur desaroyo den komunidat nos ta na altura di dje.

Pero kada ken mester keda den nan ròl si. Kolaborashon ta mas ku bon biní. Mi a menshoná diferente ehèmpel dikon Gobièrnu ta para habrí pa kolaborá. Sigur si ta proposishonnan konstruktivo, realístiko i konkreto. Pero mi no por duna bo rienda di pais, si esei no ta bo ròl. I esaki no tin nada di haber ku arogansia. Mi a hasta duna ehèmpel dikon Gobièrnu ta habrí pa papia ku tur hende, asta oposishon. Pero nos ta keda responsabel pa tomo di desishon. Pa e desishonnan ku nos tuma i e esunnan ku nos no tuma.

Papiando di no tuma desishon, mi kier bini riba e punto di medida i ahuste. Ta un realidat fiho ku Kòrsou, den Reino Hulandes, tin un lei di supervishon finansiero ku si nos no kumpli kuné e siguiente paso ta kuratela, i despues di esei ta un ‘Algemene Maatregel van Bestuur’. E ora ei nos ta pèrdè tur outoridat pa disidí rumbo di nos mes futuro. I si ta un mensahe nos tin ku saka for di e aanwijzing ku Hulanda a duna nos sin mas, ta ku Hulanda ta kere firmemente den ousteridat..

CFT tin 2 aña ta kanta ousteridat, esta medida, sabiendo nos situashon ekonómiko. I sabiendo ku na 2013 ya e Gobièrnu anterior a tuma sierto medidanan. Na 2017, CFT a kanta medida. Gobièrnu a introdusí ‘verplichtingenstop’ riba su presupuesto i a inisiá prosesonan finansiero nobo. Gabinete Rhuggenaath no a tuma medida riba pueblo.

Na 2018, CFT a kanta medida. Gobièrnu a sigui baha gastu serka su mes i a sigi ku ‘verplichtingenstop’, i a bin ku proyekto pa subi entrada di belásten. Tur esakinan nos ta kuminsando na mira e frutanan e aña akí. Ta kobrando mas na belásten i tin mihó kontròl finansiero. 2018 a sera ku ménos défisit, sin tuma medida riba pueblo.

Esaki ta pa tur hende kòrda ku nos tin 2 aña ta tuma e karga riba nos mes komo Gobièrnu. I manera tin stipulá netamente den e Akuerdo di Kresementu, nos lo sigui. Tin un kantidat di ahuste ku den Gobièrnu mes tin ku sigui sosodé. Tin un kantidat di reforma ku tin ku bin pa e biaha akí si nos logra kambionan mas duradero.

Pero mirando e pronóstiko di 2019, i awor k’un ‘aanwijzing’, tur hende mester kompronde ku nos tin 2 opshon:

  1. Nos tin un Akuerdo di Kresementu, kaminda tin ahustenan pa Gobièrnu i pa komunidat di forma mas balansá i mará na invershonnan nesesario.Un pakete mas balansá ku kalkulashonnan ku nos a hasi anterior mes, i tambe na luna di mart ku a pasa, pasó nos a tene kuenta ku situashon di nos pais. Òf:
  2. nos por keda sin hasi’é na nos manera i warda e ousteridat di segun e modelo neo-liberal di Hulanda mes, bou di nan supervishon. Keremi, esei lo hasi hopi pero hopi mas doló.

Nos ta den un situashon kaminda nos mester di otro. Gobièrnu sa ku komunidat ta enfrentá ku yen reto. Esaki ta resultá den hopi insiguridat, tenshon i pues divishon bou di nos hendenan. Pero aworaki no ta momento pa nos laga informashonnan deskabeyá dividí nos. Mayoria bia hopi di e informashon aki ta kontradesí otro. Konsekuentemente, hende no sa mas kiko nan kere anto ken nan skucha òf sigui. I aki tin un responsabilidat grandi pa medionan di komunikashon i personanan ku ta kompartí informashon riba medionan sosial. Pa boso ta krítiko, pero balansá i pa nos tené na un nivel kaminda nos ta keda ku balor kompartí di ta un siudadano.

Aworakí no ta momentu pa laga disturbio paralisá nos. Tur energia i fokùs mester ta riba: kiko ami por hasi pa mi pais? Legumai Gabinete Rhuggenaath. Kiko bo por hasi pa bo mes, bo próhimo, bo bario, bo trabou/negoshi, bo komunidat. Awor aki no ta ora pa mas polémika i politikeria. Bin mesa ku bo ideanan. Ban wak #huntu kiko ta e faktornan ku ta mara nos. Ora e momentunan ta mas duru, nos mester bira mas fuerte komo komunidat. I nos tin ku kòrda ku e balor ku nos ta duna un otro, ta netamente loke nos ta spera di haña bèk.

Mi kier reta un i tur pa reflekshoná kon nos ta bai konstruí nos pais, kon nos ta bai fortifiká nos nashon. Kon abo, ami i nos ta bai krese. Kon nos ta bai krese den nos responsabilidat? E momentunan akí ta tèst nos abilidat di krese, komo hende i komo pais. E ta tèst nos abilidat di ta resistente. E ta tèst nos abilidat pa por adapta i surpasá.

Kambionan profundo manera esnan ku nos ta para su dilanti na e momentunan akí ta rekirí un adaptashon total di nos mentalidat i di e forma ku nos ta aserká situashon i sirkunstansianan. I si tin un kos ku ta para manera un bèrdat – ‘als paal boven water’ – ta ku “Nos mes ta nos mes.” Ta nos mester tin e pais akí i nos siudadanonan na pechu.

Ban wak otro den kara i trata otro ku rèspèt i balor pa nos por sali afó huntu.

Ban krese den nos responsabilidat. Apesar di tur kos, tur reto ta un oportunidat pa algu muchu mas mihó.

Ministerio konserní

Bo opinion