Notisia

REPRESENTASHON DI UNIDO DI BISHITA NA KÒRSOU

Geplaatst op 26 Novèmber 2018 dor di Ministerio di Desaroyo Ekonómiko

WILLEMSTAD- Riba invitashon di Ministerio di Desaroyo Ekonómiko (MEO), UNIDO lo ta na Kòrsou riba dianan 26 te ku 29 di novèmber di e aña aki.

 

United Nations Industrial Development Organization (UNIDO) ta e agensia spesialisá di Nashonnan Uni ku ta promové desaroyo industrial pa redukshon di pobresa, globalisashon inklusivo i durabilidat ambiental. UNIDO ta duna asistensha tékniko na no ménos ku 168 pais rònt mundu.

Durante di e bishita e delegashon aki lo hiba kombersashon ku representantenan di Ministerio di Desaroyo Ekonómiko i tambe lo interkambiá di pensamentu ku diferente otro instansia i organisashon relevante.

 

Ministerio di Desaroyo Ekonómiko a kuminsá ku e proseso pa aktualisá e maneho industrial di Kòrsou i pa kaminda ta nesesario revisá esaki pa asina e maneho aki por ta mas fleksibel pa por atendé ku e kambionan riba e merkado internashonal, pa por drecha nos posishon di kompetensha, pa hisa nos produktividat, redusí importashon i stimulá èkspòrt.

 

E intenshon ta pa UNIDO asistí Ministerio di Desaroyo Ekonómiko den e proseso ariba menshoná.

Ministerio konserní

Bo opinion