Notisia

ROP ta informá e prosedura pa otorgá adrès ofisial.

Geplaatst op 2 Ougùstùs 2018 dor di Ministerio di Tráfiko, Transporte i Planifikashon Urbano

ROP ta informá e prosedura pa otorgá adrès ofisial. 

Willemstad - Tur persona ku ta biba na Kòrsou mester inskribí nan mes na Kranshi i pa hasi esaki, e persona mester di e adrès ofisial di su bibienda, sea ta kas òf un edifisio. Tambe na momentu ku un persona muda, e mester kambia su adrès na Kranshi. Un adrès korekto ta di vital importansia pa diferente motibu. Unu prinsipal ta pa servisionan di emergensia manera Ambulans, Polis i Brantwer por yega rápidamente den kaso di kualke insidente. Servisio pa Planifikashon Urbano (ROP) ta e organisashon di Gobièrnu ku ta enkargá pa otorgá adrès ofisial na tur kas òf edifisio. Na momentu ku un persona mester di su adrès ofisial pa kualke motibu, e mester akudí na ROP na Plasa Horacio Hoyer 19.

Hasi petishon
E persona ku tin mester di su adrès ta bin personal na ROP i yena e formulario pa otorgashon di adrès ku ta optenibel na bali. E persona aki mester bin ku:
- kopia di su ID válido, sea sédula òf reibeweis,
- number di e pèrmit di konstrukshon otorgá mara na e konstrukshon na e adrès indiká (“bouwvergunning nummer”)
- splikashon verbal òf por eskrito unda e parsela ta situá  
Ta atendé solamente petishonnan ku ta kompleto. Si e persona no tin su ‘bouwvergunning nummer’ pa kualke motibu, e por pidi na balie di ROP pa e number.

Evaluashon
ROP ta evaluá e petishon i dentro di un siman e kliente mester bin bek na ROP pa risibí kontesta. Si e parsela ta bin na remarke pa un nòmber di kaya i number, e persona mester paga gastunan atministrativo (‘leges’) di Naf 12.50. Pa paga esaki por ‘swipe’. Despues ku e hasi e pago, e ta risibí un komprobante ofisial di ROP ku su adrès korekto riba dje.

Kaya sin nòmber
Na momento ku e kaya konserní no tin un nòmber ainda, e persona ta risibí un karta ku ta inform’é ku e kas òf edifisio ta mantené e number di e kavel eksistente temporalmente.

Den vários bario na Kòrsou, Gobièrnu a duna kayanan nòmber. Tambe a bin bario nobo i tin barionan ku no a yega na turno pa kayanan risibí nòmber. Ora un siudadano su kaya risibí un nòmber nobo, ta nesesario pa e siudadano pasa na ROP i hasi petishon pa un adrès ofisial segun e prosedura ya indiká.

Pa pregunta general por tuma kontakto ku ofisina di ROP via e number 433-3200 òf por pidi e formulario via e-mail na info.rop@gobiernu.cw.

 

 

Ministerio konserní

Bo opinion