Notisia

“Rueda de Negocios” na Riohacha ku benefisio komersial pa Kòrsou.

Geplaatst op 30 Mart 2019 dor di Ministerio di Enseñansa, Siensia, Kultura & Deporte

Willemstad- Durante su estadia na la Guajira Colombia, Minister di Enseñansa, Siensia, Kultura i Deporte sra. Marilyn Alcalá-Wallé a asistí huntu ku Direktor di Sektor di Kultura i Deporte sra. Lizette Sambo-Velder, MBA na un Rueda di Negoshi (Rueda de Negocios) durante henter un mainta.

E Rueda di Negoshi aki ta un plataforma ideal kaminda diferente kampesino, empresario i negoshantenan potensial ta bini huntu pa nan merkadeá nan produktonan i kaminda por i a sera diferente akuerdo pa pone nan produktonan riba merkado komersial. Presente na e Rueda di Negoshi aki tabatin banda di e diferente negoshante di e diferente munisipionan, tambe empresarionan for di Aruba i Kòrsou i durante e enkuentro aki a sera diferente akuerdonan komersial.

Un di e akuerdonan ku a sera ta ku ta bai eksportá for di la Guajira produktonan manera fruta i berdura, i otro produktonan di promé nesesidat manera aros i tambe kòfi pa Kòrsou. Pa lokual ta trata e “ekonomia oraño” (kultural kreativo) tin diferente akuerdonan será ku tantu Kòrsou komo Colombia ta bai probechá. Ta bai tin interkambio kaminda Kòrsou ta sirbi komo e trampolin pa por haña produkto lokalmente pero tambe pa eksportá produktonan no solamente pa Karibe pero tambe pa diferente otro regionnan. Banda di esaki Kòrsou por eksportá tambe pa Colombia kuminsando ku la Guajira (Kòrsou komo un hub).

Anto den esaki ya a hasi palabrashon konkreto ku e promé lancha pa lokual ta trata fruta i bèrdura ta sali bai Kòrsou pa dia 27 aprel próksimo i tambe ku ta tene un eksposishon empresarial pa por eksponé nan produktonan.

 

*************************************************

Ministerio konserní

Bo opinion