Notisia

SDKK a aportá na siman di fishi di skol Dr. Albert Schweitzer

Geplaatst op 3 Yüni 2019 dor di Ministerio di Hustisia

WILLEMSTAD— Konforme e maneho di Minister di Hustisia sr. Quincy Girigorie, den e siklo pa duna informashon na pueblo di Kòrsou, dor di e diferente organisashonnan ku ta ubiká den e kadena hudisial, e siman aki a toka turno na un di e guiado di aktividatnan,

sra. S. Llewelyn i un trahadó penitensiario sra. X. Bertrand, di Sentro di Detenshon i Korekshon (SDKK) na e alumnonan di grupo 8 di e skol Dr. Albert Schweitzer. Sra Llewelyn a duna informashon tokante e aktividatnan ku ta wòrdu organisá ku, pa, dor i huntu ku e klientenan i sra. Bertrand a duna informashon tokante e parti di guia i mèntòr pa ku e klientenan.

E meta tabata pa duna informashon balioso na mucha- i hóbennan pa ora nan ta bai hasi nan eskoho pa studia un fishi. Kuater grupo di e skol a haña informashon tokante di entre otro: dikon e persona a skohe pa e fishi aki, ki tipo di estudio bo mester sigui, kon un dia di trabou ta, kon bo ta traha, kiko ta e promé kosnan ku bo tin ku hasi den kuadro di bo fishi ets.

Tabata un plaser kon pa mira kon i tende ku klasnan ku normalmente ta hasi hopi fèrfelu a sinta skucha ku hopi atenshon durante di e seshon di informashon aki. Tambe e alumnonan a duna konsehonan na e guiado di aktividatnan di SDKK, por ehèmpel: kua tipo di aktividatnan mas nan lo por organisá den SDKK. Tambe e alumnonan a tende di sierto aktividatnan ku SDKK ta organisá ku e klientenan i ku nan ta haña ku na skol tambe nan por organisá esakinan.

Tim di maneho di SDKK ta hopi kontentu di por a duna oido na e petishon aki di e skol

Dr. Albert Schweitzer pa asina splika e alumnonan tokante di un di e retonan di mas grandi i alabes un responsabilidat kompartí, ku SDKK tin ta pa kambia i/òf ahustá e imágen ku komunidat tin di aktual klientenan i esnan ku tin un kastigu di prizòn tras di lomba. Un imágen por sierto ta opstakulisá un aseptashon digno i real di e persona ku ya ta i a kumpli ku su kastigu.

Tambe e guiado di aktividat sra. Llewelyn a bai ku un par di muestra di tur e produktonan ku e klientenan ta traha i hasi den SDKK. Manera entre otro trahamentu di unifòrm di klientenan mes i unifòrm di trabou di e personal di SDKK, furamentu di stulnan kibrá den SDKK mes, fèrfmentu di Chichi i tambe e kosementu di tas. Esaki ta trata di e proyekto ku un grupo di kliente a gana un premio di Curaçao Innovation en Technology Institute, den kuadro di e kompetensia di Social Innovation Award, aña pasa na novèmber.

Ku esaki SDKK ta trata, kada okashon ku e haña, na suprayá e importansia di e eksistensia di resosialisashon den un forma struktural, permanente i profeshonal den SDKK ku Minister Girigorie a bini ta enfoká riba dje.

Tambe a bini dilanti ku kada un hóben ku kai den man di Hustisia ta unu di mas. Ta p’esei a para ketu tambe na e aspekto di e komportashon paden i pafó di klas bou di e alumnonan.  

SDKK ta apresiá i elogiá e echo ku e lema di e skol Dr. Albert Schweitzer ta:

“E skol ku pashon pa siñamentu”.

 

Ministerio konserní

Bo opinion