Notisia

SDKK ta organisá huntu ku Serena’s Art Gallery tayer di Arte fèrf “Chichi”

Geplaatst op 1 Ougùstùs 2018 dor di Ministerio di Hustisia

Willemstad – ‘Realisando e máksimo potensial di Kòrsou’: asina aki SDKK ta buska  aliansanan positivo pa krea oportunidatnan balioso pa esnan ku ta detené den e instituto. Ku esaki e maneho interministerial di Minister di Hustisia sr. Quincy Girigorie den kolaborashon ku su kolega Minister di Enseñansa, Siensia, Kultura i Deporte, sra. Marilyn Alcalá-Wallé wòrdu visualisá. Nan a uni forsa pa mustra nan vishon i mishon kompartí pa loke ta trata entre otro e desaroyo artístiko kultural di nos siudadanonan, partikularmente di nos hóbennan detené den SDKK.

Den tur sosiedat kaminda konsientemente ta traha na edifikashon di un pueblo, diferente instrumentonan di edukashon i formashon a i ta wòrdu uzá komo fundeshi pa desaroyonan positivo i deseá. Pa e motibu ei gobièrnu di Kòrsou ta di opinion ku mester duna kada siudadano, mas tantu posibel, e posibilidat pa desaroyá su talento - i abilidatnan natural. 

Konforme e evaluashon i análisis di e diferente nesesidat- i deseonan di e habitantenan di SDKK a detektá e interes ku tin pa Arte. Esaki a kondusí na entre otro kòmbersashonnan entre e Tim di Maneho i Guiadó di Aktividatnan di SDKK i e tim di Serena’s Art Gallery. Finalmente esaki a resultá den un proseso kaminda e habitantenan di SDKK ku tabatin interes, a haña un seshon di informashon kaminda nan a wòrdu informá di e kontenido i kondishonnan pa por a partisipá i alabes nan por  a inskribí pa partisipá na e tayer.

Meta di e tayer tabata pa deskubrí talentonan skondí, dor di stimulá kreatividat artístiko komo un forma di terapia. Ku e posibilidat pa bai un aliansa permanente pa asina den kuadro di nan proseso di resosialisashon, krea kupo di trabou pa e habitantenan di SDKK durante di nan detenshon.

Tur esnan ku a hinka nan forsa pa por a realisá e tayer aki ta konsiente di e situashon finansiero di Kòrsou. Ku huntu i den un forma efektivo i efisiente, mester hasi uso di e medionan disponibel pa asina yuda pone atenshon nan  diferente aspekto importante den nos komunidat. Manera e entre otro e ròl, situashon i/òf posishon di SDKK den nos komunidat, nivel i komportashon di nos adultonan/trahadónan pa ku nos hóbennan i vise vèrsa i e importansia di norma i balornan kompartí. Meskos ku Gobièrnu, SDKK ku ta forma parti di e totalidat, tambe ta usa e kuater instrumentonan prinsipal ku ta formashon/enseñansa, siensia, kultura i deporte, pa koregí desaroyonan ménos faborabel den nos instituto, i asina hasi lo máksimo posibel pa realisá e kambionan nesesario,deseá i positivo den e manera aktual di pensa i aktua di e habitantenan di SDKK. 

Na komienso di e tayer e tim di Serena’s Art Gallery a duna un splikashon ekstenso na e partisipantenan kiko ta e orígen di e pòpchinan “chichi” i nan eksperensia balioso ku turistanan ku ta bishita nan. Meskos ku SDKK nan tambe ke pa e turista tin un bon imágen di Kòrsou. Ta p’esei pa bo por fèrf un pòpchi ‘chichi’, bo mester hasi esaki ku amor i empatia, es desir ‘di bo kurason’.

Ta p’esei ta importante pa mustra pueblo di Kòrsou di un banda ku, lòs di e echo ku e habitantenan a faya ku nos leinan vigente i nan ta será den SDKK, di otro banda nan tin nan parti positivo tambe ku nan por ekspresá di e forma aki.

Esnan ku a partisipá na e tayer aki a reakshoná na final hopi positivo i a eksperensiá e tayer komo un forma pa ekspresá nan mes emoshonalmente. Nan tabata orguyoso i satisfecho ku nan obra di arte i lo ke sigui hasi esaki den futuro.

Pa medio di e tayer aki a bini hopi kla pa dilanti ku ta importante pa tambe krea/fasilitá/ofresé posibilidat artístiko na e habitantenan di SDKK pa nan por sinti nan parti di nos komunidat. Su efekto terapéutiko tabata bisto i asina a siña nan kon den un forma positivo nan por hasi uso di nan tempu liber. E kreatividat ku a wòrdu desplegá tabata impreshonante pa tur esnan presente. Na tur tabatin 30 partisipantenan maskulino i femenino. Mas òf ménos 4 a resultá di tin un talento i kreatividat ekstraordinario. Esaki a wòrdu demostrá a base di e resultadonan ku tabata di un nivel kualitativamente hopi haltu.

Kontinuashon di a proyekto aki mester dirigí su mes riba e proseso di desaroyo di e partisipantenan di SDKK i pa krea un produkto kualitativamente haltu ku por wòrdu bendé.

Un komunidat eduká, formá i ku étika (norma i balornan haltu) i empatia pa su kosiudadano ta forma un komunidat ku por bria awor i den futuro. SDKK ke ta parti di e desaroyo aki ku riba tereno di formashon ta bai pa ekselensia.    

 

Ministerio konserní

Bo opinion