Notisia

SEKTOR TURÍSTIKO TA SIGUI AVANSÁ DEN E BON DIREKSHON

Geplaatst op 29 Òktober 2019 dor di Ministerio di Desaroyo Ekonómiko

WILLEMSTAD- E promé 9 lunanan di aña 2019 a marka un inisio sumamente positivo pa nos sektor turístiko. Esaki Minister di Desaroyo Ekonómiko, sra. Giselle Mc William a duna di konosé den e di tres konferensia di prensa di sektor turístiko pa aña 2019 huntu ku Ministerio di Desaroyo Ekonómiko (MEO) i su partnernan ku ta Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Authority (CPA).


E sektor turístiko ta keda un di e sektornan den nos ekonomia ku durante tempu a sa di trese invershonnan balioso pa Kòrsou, generá kuponan di trabou i ta alabes e sektor ku ta representá un konekshon indispensabel ku diferente otro sektornan ku turistanan ta hasi uso di dje miéntras nan ta di bishita riba nos isla. Ku satisfakshon nos por mira bèk pa algun tempu kaba  ku e sektor aki a bin ta floresé i krese progresivamente.
Periódikamente partnernan den e sektor turístiko ta bini huntu pa asina duna un bista den sifranan turístiko di nos pais i su impakto pa ku nos ekonomia. E biaha aki ta trata e periodo di yanüari te ku sèptèmber 2019.

Durante e konferensia di prensa CTB a reportá ku un total di 346,440 turista di estadia a keda risibí durante e promé 9 lunanan di 2019. Na aña 2018 durante e mesun periodo aki Kòrsou a risibí 311,384 turista di estadia, lokual ta na nifiká un oumento di 11%. Nos 6 merkadonan prinsipal esta: Hulanda, Estádos Unídos, Colombia, Canada, Alemania i Brazil a sòru pa 77% di tur bishitante ku nos a risibí durante e promé 9 lunanan di aña. E 4 regionnan tur a konosé subida e promé 9 lunanan di aña. Nort Amérika a subi ku 7%, Sur Amérika ku 14%, Karibe ku 20% i Europa a krese ku 11%. Turistanan a keda un total di 3 mion anochi riba nos pais resultando den kresementu pa loke ta trata e promé 9 lunanan di aña kompará ku e mesun periodo aki na aña 2018. E kresementu registrá den kantidat di anochi durante e promé tres kuartal di aña tabata di e siguiente manera: promé kuartal a krese ku 9%, di dos kuartal ku 13% i e di tres kuartal a krese ku 1%. 

Pa loke ta trata sifranan di okupashon turístiko pa e promé tres kuartal di 2019, CHATA ta reportá un okupashon di hotèl promedio di 67.9%. Esaki ta un bahada di 2.5 punto di porshento kompará ku aña 2018 kaminda esaki tabata 70.4% di okupashon. E tarifa promedio diario (ADR) den su totalidat a subi ku 0.5%; di $143.56 na 2018 pa $144.32 na 2019 i e entrada pa kamber disponibel (RevPAR) promedio a baha ku 2.5%; di $101.16 na 2018 pa $98.57 na 2019.

Di akuerdo ku sifranan di prestashon di turismo krusero, CPA a duna di konosé ku den e promé tres kuartal di 2019 Kòrsou a risibí un total di 203 barku krusero. Esaki ta un oumento di 2% kompará ku e periodo aki na aña 2018. Pa loke ta trata kantidat di turistanan krusero, un total di 541.621 pasahero krusero a bishitá nos isla den e promé tres kuartalnan di aña 2019 resultando den un oumento di 3.1% kompará ku e promé tres kuartal den 2018.

MEO a duna di konosé  ku e prestashon i desaroyonan den sektor turístiko pa e di tres kuartal di 2019 tabatin un impakto positivo riba ekonomia di nos pais. Esaki debí na e kresementu di tantu turismo di estadia komo turismo krusero den e periodo tras di lomba. Ta proyektá ku den e promé 9 lunanan di aña 2019 e sektor di turismo a generá un total di mas òf ménos 1.6 bion florin pa nos ekonomia. Kompará ku e mesun periodo aki den 2018 esaki ta un subida di mas ku 7.8%. Si turismo sigui krese manera a wòrdu proyektá, MEO ta ferwagt ku e lo tin un efekto positivo riba Kòrsou su Produkto Interno Bruto den 2019.

Pa por mira e presentashon kompleto di e diferente partnernan den e sektor i tambe detayenan di tur e sifranan ariba menshoná, un i tur por bishita e página di Facebook di Ministerio di Desaroyo Ekonómiko.

 

Ministerio konserní

Bo opinion