Notisia

Seminario tokante Kambio di Klima

Geplaatst op 5 Sèptèmber 2019 dor di Ministerio di Tráfiko, Transporte i Planifikashon Urbano

Willemstad – Djaweps 5 di sèptèmber, Servisio Meteorológiko a organisá un seminario relashoná ku kambio di Klima. Sra. Zita Jesus Leito, Minister di Tráfiko, Transporte i Planifikashon Urbano, bou di kua Servisio Meteorológiko ta resortá, tabata tin e enkargo pa habri e Seminario.

Servisio Meteorológiko di Kòrsou a risibí fondo for di UNESCO pa un proyekto titulá Curaçao Climate Change Policy Assessment den kolaborashon ku e komité di kambio di Klima di Komishon Nashonal Kòrsou di UNESCO.

E komité aki, presidí pa Servisio Meteorológiko, ta preparando aspektonan relashoná ku Kambio di Klima ku por wòrdu usa pa traha un maneho di klima na nivel nashonal. E ophetivo prinsipal di e proyekto aki ta pa halsa e nivel di resistensia di Kòrsou relashoná ku e impaktonan di peligernan di Naturalesa kondusí dor di kambio di klima. Esaki por wòrdu logra dor di fortalesé e kolaborashon entre organisashonnan di gobièrnu, sektor priva i e NGO nan, pa huntu desaroyá i traha rapòrtnan ku por wòrdu usa pa desaroyá e Plan Nashonal di mitigashon i alabes adaptashon pa Kòrsou.

Minister Jesus-Leito a trese dilanti den su disertashon ku banda di e impaktonan di Orkan manera bientu fuerte, laman brutu i áwaseru torenshal, tin otro fenómenonan di naturalesa por pone bida di hende na peliger ku ta wòrdu kousa dor di kambio di klima. Esakinan ta manera áwaseru ekstremo ku ta kousa inundashon rápido, laman brutu kousa dor di bientu fuerte òf resake ku ta afektá fasilidatnan na kosta sùit, ola di kalor i sekura ekstenso ku tin impakto riba nos salu.

E impaktonan dor di Kambio di Klima ta premirá di oumentá durante e próksimo añanan. Esaki lo tin konsekuensia espesialmente pèrdida di ekonomia dor di skarsedat di kuminda, hopi mas malesa manera dengue, zika, chigunia (malesa relashoná ku sangura) kalidat i kantidat di awa supteranio i oumento di wer severo.

Un bon kordinashon entre gobièrnu, sektor priva i NGO nan ta esensial pa salbaguardiá bida di nos pueblo i desrupshon largu di nos ekonomia.

En bista di esaki Minister Jesus-Leito ta aploudí e proyekto aki Curaçao Climate Change Policy Assessment pa asina nos dal e promé pasonan pa koordiná tur e esfuersonan ku ya a wòrdu desplegá kaba na Kòrsou. I ku finalmente lo por traha un Plan Nashonal di mitigashon i Adaptashon pa Kòrsou i nan implementashon.  Na final di luna di novèmber lo tin un reunion kaminda lo trese e resultadonan.

 

 

Ministerio konserní

Bo opinion