Notisia

Servisio di Atmishon ta optimalisà e proseso di pago di deposito na ofisina di Impuesto

Geplaatst op 5 Aprel 2017 dor di Ministerio di Hustisia

Servisio di Atmishon ta informá ku den kuadro pa mehorá e kalidat di servisio i pa fasilita e proseso di pago di e deposito, entrante 1 di aprel 2017 por download e formulario pa bai paga e deposito for di e página wèp di Servisio di Atmishon (www.gobiernu.cw).

Personanan pa kual nan promé petishon pa un pèrmit di estadia a keda aprobá, mester paga gobièrnu e asina yamá deposito. E deposito ta fungi komo un garantia mínimo ku gobièrnu no mester kubri e gastunan envolví pa retorná un persona na su pais di origen.

Na e momentunan aki ora ku un persona risibí e desishon riba su petishon pa un promé pèrmit ku a keda otorgá, e mester akudí na Servisio di Atmishon pa risibí un voucher. Ku e voucher e persona mester akudí na ofisina di Impuesto pa hasi pago di e deposito. Entrante 1 di aprel 2017 no mester akudí mas na Servisio di Atmishon pa risibí e voucher. E persona ku risibí un desishon positivo riba su petishon mes por download e formulario pa e pago for di e página wèp di Servisio di Atmishon. Esaki mester keda yená dor di e persona pa e por hasi su pago di deposito na ofisina di Impuesto. Ta bon pa tene na kuenta ku no tin un base hurídiko pa duna sèn bèk ora un pago keda hasí siendo e desishon ta negativo.

Si un persona tuma e desishon pa no sigui biba na Kòrsou, e por hasi e petishon pa risibí e montante pagá na deposito bèk. E proseso pa esaki si a keda meskos.

Pa mas informashon por tuma kontakto ku Servisio di Atmishon na telefòn 733-2000 òf por manda un email na info@immigrationcur.org

Ministerio konserní

Bo opinion