Notisia

Servisio pa Obra Públiko (OW) tin direktor interino nobo entrante 2 yanüari 2019

Geplaatst op 20 Desèmber 2018 dor di Ministerio di Tráfiko, Transporte i Planifikashon Urbano

Servisio pa Obra Públiko (OW) tin direktor interino nobo
entrante 2 yanüari 2019

Willemstad - Minister Zita Jesus Leito huntu ku Servisio pa Obra Públiko (OW) ta anunsiá ku entrante 2 di yanüari 2019 OW tin un direktor interino nobo. E direktor interino nobo ta señor Michael Willem.

E direktor interino nobo lo ta enkargá  ku kordinashon i implementashon di e restrukturashon di OW i lo dirigí e servisio pa un tèrmino di 1 aña. Durante di esaki e lo asistí  ku e trayekto pa atraé un direktor permanente pa e servisio. E direktor interino lo ser asistí dor di e tim di maneho diario di OW huntu ku e direktor suplente aktual.

Sr. Willem tin un preparashon akadémiko den ekonomia, maneho i ta un eksperto stratégiko ku mas di 15 aña di eksperensha den sektor priva i sektor públiko. E tabata entre otro hefe di e departamentu nan di kontratashon i  kontròl di proyektonan di SHELL/Isla. Sr. Willem ta dominá tambe e parti operashonal, ta na altura di asuntunan den organisashonnan gubernamental i tin un bista amplio di maneho.

Na novèmber 2017 minister di Tráfiko, Transporte i Planifikashon Urbano (VVRP) Sra. Jesus Leito a duna e señal pa kuminsá ku restrukturashon di OW. Ku sosten di KPMG,  tòp di e organisashon, sindikato,  i miembronan di tim di maneho di e Ministerio a kuminsá atendé e ambishonnan di e organisashon. Durante di e trayekto a enfatisá riba e nesesidat pa yena e funshon di direktor di OW ku ta vakante.

Dor di yena e funshon ku un direktor interino, a logra un punto importante den e trayekto di restrukturashon. E siguiente stap ta pa sigui traha pa logra e metanan stratégiko pa duna mihó servisio na komunidat. Esakinan ta entre otro maneho efisiente, lei nobo i adaptá, optimalisashon di prosedura finansiero, un plan di kapasitashon di personal i diferente proseso i teknologia moderno.

Nos ta deseá Sr. Willem i e servisio di OW éksito pa kaba e trayekto importante aki pa Pais Kòrsou.

Pa pregunta por yama òf whats app na 511-8582. Pa tur informashon i desaroyo general di Servisio pa Obra Públiko por bishita e website na www.vvrp.cw, facebook página MinisterieVVRP i instagram MinisterieVVRP.

Ministerio konserní

Bo opinion