Notisia

Servisio pa Planifikashon Urbano (ROP) ta trahando duru pa optimalisá nan servisio na komunidat

Geplaatst op 21 Novèmber 2018 dor di Ministerio di Tráfiko, Transporte i Planifikashon Urbano

Mihó servisio pa pueblo di Kòrsou:
Servisio pa Planifikashon Urbano (ROP) ta trahando duru pa optimalisá nan servisio na komunidat

Willemstad – Minister Zita Jesus Leito huntu ku Servisio pa Planifikashon Urbano (ROP) ta informá di diferente trayekto interno pa optimalisá servisionan ku ROP ta ofresé na pueblo di Kòrsou. For di inisio di aña 2018 diferente desaroyo interno a tuma lugá ku e mira pa fortifiká e base di ROP.

‘Baseline Study’ ta un trayekto ku Minister Jesus-Leito a inisiá den henter su ministerio. Tim di Maneho di ROP a hasi e estudio aki na di inisio di aña 2018 bou di guia di SOAB. Base-line study tabata un proseso profundo kaminda a analisá e base di ROP pa wak kua ta ROP su punto nan fuerte i ménos fuerte. E trayekto aki a enserá tambe prosesonan interno pa ku personal, pa ku otro servisio den e mesun ministerio, i tambe den gobièrnu. E trayekto aki tabata tambe pa analisá e proseso eksterno, e diferente servisionan ku ROP ta ofresé na pueblo, kon ta trata ku e kliente personalmente i via di medionan manera telefòn i e-mail, tambe kon ta informá pueblo via medionan sosial i medionan di komunikashon.

Na mitar di aña 2018, na e fase final di e base-line study, ROP a kuminsá un proseso interno pa fortifiká e konfiansa bou di e personal. Na mesun momento tim di maneho a sigui seshonnan pa fortifiká nan abilidatnan di liderazgo. E dos trayektonan aki a wòrdu guia dor di SOAB.

Otro trayektoria pa mehorá e produkto na kliente, ta prosesonan pa digitalisá diferente servisio di ROP. Banda di esaki, diferente personal di ROP a huramentá resientemente dilanti di Minister di Hustisia komo ‘buitengewoon agent van politie’ (BAVPOL) ku e meta pa por hasi inspekshonnan mas rigoroso riba konstrukshonnan. 6 empleado ta kontinuando e kurso di BAVPOL pa pronto nan tambe por huramentá. 

Tin un programa di optimalisashon ku ROP ta kontinuá pa reformulá nan proseso di petishon pa pèrmitnan di konstrukshon. Esaki ta rumbo pa digitalisashon, kaminda lo trese transparensia den e proseso pa e kliente i tambe pa e empleado. Lo bai tin un bista mas kla unda e petishon ta i kon largu e lo dura.

Otorgashon di pèrmit òf eksonerashon di ophetonan di propaganda, ta un di e produktonan mas renobá di ROP. Tur persona òf kompania por entrega nan petishon na bali di ROP na Plasa Horacio Hoyer 19 òf via di e-mail info.rop@gobiernu.cw. Riba página wep www.vvrp.cw/maneho por ‘download’ e formulario di aplikashon i tambe foyetonan informativo. Por tuma nota di tur e rekisitonan nesesario pa por apliká pa un pèrmit di eksonerashon pa pèrmit di propaganda. 

Esaki ta e diferente trayektonan interno ku ROP a kana den 2018 pa por presentá nan mes mas fuerte, transparente i kla pa duna e mehor servisio na pueblo di Kòrsou. Huntu ku Minister Zita Jesus Leito, ROP a kana tur e trayektoria aki ku hopi pasenshi i dedikashon.

ROP ta e instansia di Gobièrnu ku ta responsabel pa diferente produkto manera;

  • Planifikashon urbano;
  • Prepará programanan i proyektonan pa mehorá barionan i bibienda;
  • Traha riba plannan di maneho di bibienda;
  • Maneho pa monumentonan i asigná monumentonan protehá;
  • Kordinashon di e parti urbano di tráfiko;
  • Duna pèrmit i eksonerashon pa konstrukshon i prekario;
  • Kontrolá i sòru pa kumplimentu ku e reglanan di pèrmit;
  • Hiba kòntròl i maneho pa registrashon i evaluashon di propaganda en general;
  • Duna pèrmit pa propaganda en general.

 Pa pregunta por tuma kontakto ku ofisina di ROP via e number 433-3200 òf por aserka nos via e-mail na info.rop@gobiernu.cwTambe por Whats-app na 511-8582. Pa tur informashon i desaroyo di Ministerio di Tráfiko, Transporte i Planifikashon Urbano (VVRP) por bishita e website na www.vvrp.cw, facebook página MinisterieVVRP i instagram MinisterieVVRP.

Ministerio konserní

Bo opinion