Notisia

Servisionan ta bai traha huntu riba kas, tereno i pèrmit

Geplaatst op 4 Sèptèmber 2017 dor di Ministerio di Tráfiko, Transporte i Planifikashon Urbano

Minister di Tráfiko, Transporte i Planifikashon Urbano señora Zita Jesus-Leito den su ministerio ta pone enfoke riba un di e nesesidatnan mas básiko di tur hende, esta bibienda: “Ora un hende no tin un bon dak riba su kabes, esaki ta afektá henter su bida.” Servisionan ROP (ántes DROV), Domeinbeheer i Openbare Werken i tambe fundashonnan FKP i Kadaster  a forma un komishon pa traha dirigí riba diferente opstákulo ku ta stroba hende yega na un bibienda. E komishon aki lo raportá bèk riba e diferenshanan aki 2 luna.

E problema di bibienda ta agudo aki na Kòrsou.Hende frekuentemente ta aserká ministerio ku tur sorto di petishon relashoná ku kas, tereno i pèrmit. Esaki ta indikashon ku tin opstákulo den e prosesonan i proseduranan, loke ta kondusí na listanan di espera i retraso. Liña kòrá den tur esaki ta e falta di sinkronisashon entre e servisio i fundashonnan aki.

Komunidat

Di e otro banda, serka e komunidat tambe ta eksistí diferente opstákulo. Tin hopi hende ku ta deseá un kas di kua den realidat nan no por paga su hür òf su hipotek. Meskos tin un grupo supstansial ku a haña tereno di èrfpagt di gobièrnu, pero no a logra di kumpli ku nan dor di konstruí nan kas riba dje. Ademas tin hopi kas privá pará bashí. Ta p’esei mes e komishon ta bai hasi un análisis profundo pa sa kiko e nesesidat di bibienda realmente ta i tambe kiko ta e posibilidatnan pa esnan ku ta buska bibienda.

E servisio i fundashonnan mes ta konvensí ku e forma di traha aki, esta huntu i no banda di otro, lo hasi hopi diferensha pa klientenan. Tin hopi trabou ku ta relashoná ku otro, i pa sierto trabou e organisashonnan asta ta dependé di otro. Esaki ta pone ku e kliente tin bes ta warda un servisio òf produkto serka un organisashon, ku na su turno ta pendiente di un otro organisashon.

Otro logronan lo ta ku tantu ROP komo Domeinbeheer kada un riba nan mes a instituíun tim ku ta bai traha dirigí pa redusí retraso di petishon. Ora ROP saka su pèrmitnan den forma aselerá, FKP lo por traha mas lihé riba su proyektonan i tambe e kliente privá por sigui traha ku mas rapides riba su kas. Tambe Domeinbeheer ta bai  introdusí un front office pa mehorá servisio na kliente.

Minister Zita Jesus-Leito ta mustra ku segun ta pone e enfoke riba bibienda, na mes momentu ta krea un efekto tambe riba desaroyo ekonómiko. Esaki ta duna kontenido na un otro prioridat ku ta menshoná den e akuerdo di gobernashon. Redukshon di pèrmitnan retrasá, lo tin un efekto inmediato riba trabounan di konstrukshon i trahadónan di fishi lo haña mas trabou. Ta p’esei e siguiente enfoke di Minister Jesus-Leito lo ta redukshon di retraso relashoná ku proyektonan grandi, ku tin un impakto ekonómiko grandi. Miéntras e komishon aki ta sigui traha riba provishon di bibienda, na mes momentu ta start e mesun proseso pa aselerá proyektonan ekonómiko. E Minister pronto lo bini bèk riba e punto aki.

Ministerio konserní

Bo opinion