Notisia

Seshon di informashon tokante mantenshon di Jan Noorduynweg i Winston Churchillweg

Geplaatst op 14 Novèmber 2018 dor di Ministerio di Tráfiko, Transporte i Planifikashon Urbano

Seshon di informashon tokante mantenshon di Jan Noorduynweg i Winston Churchillweg!

Willemstad - Servisio pa Obra Públiko (OW) huntu ku Minister Zita Jesus Leito i kontratistanan CWM i MNO Vervat ta invitá habitantenan i komersiantenan di e area di Jannoorduynweg i Winston Churchillweg na un seshon di informashon tokante trabounan di mantenshon di e dos kayanan aki. E seshon ta tuma lugá djasabra dia 17 di novèmber di 3or pa 5or di atardi na Ban Bario Bek Santa Maria.

Pa alsa seguridat di tráfiko riba Jan Noorduynweg, OW ta laga elevá 2 krusada esta Jan Noorduynweg/Schonegevelstraat, i Jan Noorduynweg/Kaminda Frank Curiel. Tambe lo pone un ‘middenberm’ riba parti di Jan Noorduynweg. Meta di e krusadanan elevá aki ta pa baha e velosidat di outomobilistanan na momentu ku nan ta yega e krusada. Di e forma aki, e krusada ta bira ménos peligroso. Lo kuminsa ku e trabounan na Jan Noorduynweg dia 19 di novèmber i lo dura mas o ménos 4 siman. E trabounan ta kuminsá na altura di Pizza Hut, Santa Maria te na Rotònde na Esperamos Supermarket i ta bou di enkargo di kontratista CWM.

Pa mehorá e estado di Winston Churchillweg, OW ta laga drecha e kaminda pa outomobilistanan por kore riba un karetera ku ta den un mihó estado ku esun aktual. Trabounan di mantenshon lo kuminsa 22 di november awor i lo traha den oranan di anochi lat pa evitá molèster pa tur  ku ta frekuentá e kaya aki diariamente. E orario di e trabounan ta tuma lugá for di 9or di anochi te 6 or di mainta. Lo kuminsá for di Warda di Polis na Rio Canario te na Lusnan di tráfiko na altura di Mr. & Mrs (krusada Winston Churchillweg/Rooseveltweg). E trabounan ta bou di enkargo di kontratista MNO Vervat.

Pa habitantenan i komersiantenan di e área ta bon informá OW lo tene un seshon di informashon na Ban Bario Bek Santa Maria na altura di Pizza Hut. OW lo splika tur detaye durante e seshon di informashon di djasabra. Por konfirmá presensia via di whats app na +5999 5118582 òf por mail na info.vvrp@gobiernu.cw .

OW ta traha huntu ku Departamentu di tráfiko di Kuerpo Polisial (KPC) pa yega na rutanan alternativo. Tambe ta sòru pa habitantenan i komersiantenan keda ku akseso na nan kas òf negoshi. OW i KPC ta pidi tur outomobilista pa sigui e indikashonnan i kore ku koutela. OW ta gradisí habitantenan adelantá pa e pasenshi i koperashon.

Pa tur informashon di proyektonan di drechamentu di kaminda bishita e website www.vvrp.cw/proyekto. Tambe por like e página di facebook di Ministerie VVRP.

 

 

 

 

 

 

 

 

Ministerio konserní

Bo opinion