Notisia

Seshon tokante retonan den planifikashon urbano for di un perspektiva internashonal

Geplaatst op 11 Novèmber 2018 dor di Ministerio di Tráfiko, Transporte i Planifikashon Urbano

Willemstad – E eksperto den planifikashon urbano Sr. Derek John Martin lo tene un seshon tokante e retonan di planifikashon urbano for di un punto di bista internashonal riba djárason 14 di novèmber próksimo. E seshon aki ta organisá pa Ministerio di Tráfiko, Transporte i Planifikashon Urbano (VVRP) huntu ku United Nations Office for Project Services (UNOPS).

“Planifikashon semper ta un profeshon ku hopi reto, ku variashon, ku diferente manera di interpretashon, i ku ta kambiando konstantemente. E mundu di awendia ta hopi kompliká, dinámiko, i hopi bia no por pronostiká futuro. E retonan ku nos ta enfrentá awe ta demonstrá ku no solamente tin un konfrontashon entre e parti skur i e parti mas moral di e spiritu humano, pero tambe entre nos i e kapasidat natural di e úniko mundu den kual nos ta biba pa kual nos por mira e impakto di loke nos ta opservá. Pero, kua ta e retonan mundial eksaktamente i kiko esaki ta nifiká pa planifikashon. Kiko ekspertonan den e materia por hasi pa haña kontesta riba e retonan?”

E britániko Sr. Derek John Martin ta un outoridat riba e tereno di krea maneho urbano riba nivel nashonal i europeo. Martin a studia geografia den Reino Uni i a kaba su mahestria den planifikashon urbano i regional na Universidat di Amsterdam. Despues el a traha entre otro na e Ministerio di Bibienda, Planifikashon Urbano, i Medio Ambiente di Hulanda, na e Komishon Europeo komo sekretario general di e Federashon Internashonal di Bibienda i Planifikashon. Aktualmente e ta partisipá na diferente proyekto i investigashon di Nashonnan Uni tokante planifikashon stratégiko i koheshon teritorial.

Su seshon lo atendé ku preguntanan grandi tokante espasio i sosiedat, for di un punto di bista pragmátiko pa promové koheshon teritorial pa medio di koperashon spesífiko entre partnernan. Despues di e seshon tin oportunidat pa hasi pregunta i debatí, ku aplikashon riba e situashon di planifikashon urbano na Kòrsou. Ta organisá e seshon aki den kuadro di un workshop di vishon eksperto tokante Transformashon Urbano di Kòrsou ku ta tuma lugá for di 12 te ku 16 di novèmber na Kòrsou.

E seshon ta kuminsá djárason 14 di novèmber pa 7or di anochi na Lanthùis Parera. E seshon lo ta na ingles i partisipashon ta grátis. Registrashon adelantá no ta nesesario.

 

Ministerio konserní

Bo opinion