Notisia

Skol pa bo Yu

Geplaatst op 8 Yüli 2019 dor di Ministerio di Enseñansa, Siensia, Kultura & Deporte

Willemstad- E temporada di buska skol pa yu ta rekerí atenshon. P’esei ta importante pa kòrda mayornan ku si ainda tin mayornan ku ta buskando skol pa nan yu(nan), por akudí libremente na “Commissie Schoolzoekenden” ku ta kai bou di Ministerio di Enseñansa, Siensia, Kultura & Deporte. Meta di e komishon aki ta pa garantisá ku kada mucha por haña skol pa segurá ku nan ta haña e formashon nesesario. Esaki ta den kuadro di e stipulashon di e lei di Enseñansa Obligatorio.

E komishon ta konsistí di representante di direktiva di Skolnan: RKSB, VPCO, DOS (Servisio di skol Públiko) SCONS, FSHP, representante di Maneho di Enseñansa, Siensia, Kultura i Deporte. Huntu nan ta inventarisá i trese solushon pa kada mucha ku mester di skol. Esaki ta keda guiá dor di e Direktor di e Sektor di Enseñansa i Siensia, sr. W. Kleinmoedig.

Minister Marilyn Alcalá-Wallé ta hasi petishon na tur mayor ku tin yu ku no ta kedando kla ku skol pa tuma kontakto ku Ministerio serka sra. N. Davelaar na T: 732-4324. Por pasa personalmente alabes na Bonbini Busines Center: 8.00-11:30 i 14:00-16.00. Tene na kuenta ku mayornan òf tutornan mester bin ku informashon relevante di e yu manera, nòmber kompletu, number di sédula, adrès i e informashon di e delaster skol kaminda e yu a partisipá.

#commissieschoolzoekenden #buskaskol

Ministerio konserní

Bo opinion