Notisia

SOAW i Aqualectra ku palabrashonnan nobo pa yuda klientenan di e ministerio ku debe di awa i koriente

Geplaatst op 29 Òktober 2019 dor di Ministerio di Desaroyo Sosial, Labor i Bienestar



Willemstad - Un di e retonan di mas grandi ku Ministerio Desaroyo Sosial, Labor i Bienestar tin ta e kantidat grandi di kliente ku tin un debe hopi altu i/òf a keda deskonektá for di e ret di koriente i/òf awa di Aqualectra. Resientement Ministerio di Desaroyo Sosial, Labor i Bienestar (DSLB) a reuní ku gerensia di Aqualectra pa yega na solushon struktural pa yuda e grupo spesífiko aki ku no ta logrando pa kumplí ku nan responsabilidat i debernan den e kaso aki. Resultado di e reunion ta algun palabrashon nobo entre Ministerio di Desaroyo Sosial, Labor i Bienestar i gerensia di Aqualectra pa asina remediá i solushoná e problemátika akin a un forma mas efektivo.


Aqualectra i Ministerio di Desaroyo Sosial, Labor i Bienestar a palabra ku Aqualectra lo proponé un fórmula pa pone Ministerio di Desaroyo Sosial, Labor i Bienestar na altura, dos siman adelanta, ku lo deskonektá un kliente di e ministerio. Lo introdusí tambe komo eksigensia ku tur kliente, ku aserká ministerio di Desaroyo Sosial, Labor i Bienestar pa yudansa, mester bai di akuerdo pa pone Pagatinu. Ministerio di Desaroyo Sosial, Labor i Bienestar huntu ku Aqualectra lo sigui konsientisá e komunidat tokante topikonan manera uso efektivo di awa i koriente, i kumplimentu ku nan responsabilidat. Por ultimo Ministerio di Desaroyo Sosial, Labor i Bienestar ta bini ku un proposishon strukturá i konkreto pa atendé ku areglo di pago di klientenan di e ministerio ku no por kumpli ku e eksigensianan di Aqualectra debí di nan entrada.
Otro puntonan ku a ser tratá durante di e reunion aki tabata introdukshon di sistema nobo di Pagatinu pa awa, atministrashon dor di Aqualectra di e supsidio di Awa i Koriente ku klientenan di DSLB tin derechi riba dje, un sistema di areglo di pago segun e maneho nobo di Aqualectra i debenan di kliente hopi altu komo resultado di manipulashon ku kashi koriente o e ret di awa i koriente dor di kliente. Aqualectra i Ministerio di Desaroyo Sosial, Labor i Bienestar, a palabrá ku lo sigui reuní mensualmente pa diskutí puntonan di atenshon pa ku e klientenan di e ministerio i sigui konsientisá komunidat.

 

Ministerio konserní

Bo opinion