Notisia

Studiantenan di Kòrsou na FIU ta solisitá ahuste den maneho di Finansiamentu di Estudio

Geplaatst op 14 Mei 2019 dor di Ministerio di Enseñansa, Siensia, Kultura & Deporte

Pa promé biaha ku un mandatario di Kòrsou ta sinta ku studiantenan den Region pa skucha nan nesesidatnan i retonan. Representashon di Studiantenan di Kòrsou na FIU ta solisitá ahuste den maneho di Finansiamentu di Estudio.

Willemstad- resientemente Minister di Enseñansa, Siensia, Kultura i Deporte sra. Marilyn Alcalá-Wallé a reuní ku algun studiante di Kòrsou ku aktualmente ta na Florida International University (FIU) pa tende di nan banda kon nan ta eksperensiando Studiamentu den Region i kua ta e ahustenan ku nan ke mira den e maneho di finansiamentu di estudio. Minister Alcalá-Wallé a reuní ku e siguiente studiantenan: Christopher M.D. Vierbergen, studiante di Landscape Architecture, Gilbert Antonio Benita, studiante di Marketing i Shannely Melania Monte, studiante di Master of Business Administration.

Durante e enkuentro e Minister a sera konosí ku e studiantenan i nan a trese diferente punto bálido dilanti manera e.o. :

  • ku tur otro pais tin nan bandera kologá na FIU Ernest R. Graham University Center komo rekonosimentu di e paisnan i identidat di e studiantenan, eksepto esun di Kòrsou;
  • studiantenan mester tin mas informashon di posibilidatnan manera “scholarship” general na Merka;
  • tin e nesesidat pa gobièrnu di Kòrsou rekonosé e Optional Practical Training (OPT) komo parti integral di e studiante su formashon, kaminda un studiante ku gradua ta keda permití dor di U.S. Citizenship and Immigration Services (USCIS) pa traha un periodo na Merka pa optené entrenamentu práktiko riba su tereno profeshonal;
  •  alabes e studiantenan ta puntra si gobièrnu por kambia maneho pa laga e periodo di entrenamentu di OPT tambe konta den e diskuento ora e graduado regresá Kòrsou bèk;
  •  atendé e petishonnan pa finansiamentu i pago di studiante mas lihé posibel pa garantisá ku e studiante por studia;
  •  atendé mas lihé posibel e “Out-of-State Tuition fee”/ kolegiatura ku aktualmente ta demasiado haltu pa un studiante;
  •  tin hopi studiante interesá pa studia na FIU pero kolegiatura ta muchu haltu;
  •  no tin bon bista riba posibilidatnan pa risibí “Scholarship” òf e no ta bálido pa studiante internashonal;
  •  tin e preokupashon di diferente studiante ku pa motibu di falta di sufisiente fondo ta pèrde konsentrashon riba nan estudio i ta pidi atenshon pa esaki;
  •  pa studiantenan ku ta kabando awor por risibí diskuento riba nan debe di estudio ora kaba (mará na sierto kondishonnan p.e. kaba den 4 aña i traha 5 aña Kòrsou)?

Minister a skucha tur e diferente puntonan ku hopi atenshon i ta bai deliberá internamente ku e tim di maneho i SSC pa verifiká di kua forma gobièrnu por yuda duna un aporte i solushon.

Na final di e enkuentro ku Minister Alcalá-Wallé e studiantenan a duna di konosé di ta masha kontentu ku bishita di Minister, pa a sinta i skucha nan opinion i nan kontribushon pa mehorashon di e sistema di finansiamentu di Kòrsou.  Nan a ekspresá di tabatin e deseo grandi pa un mandatario di Kòrsou bin Merka pa hiba kombersashon ku nan pa adaptashon di e sistema, ya ku e sistema tin referensia riba nan.

 

**********************************************************************

Ministerio konserní

Bo opinion