Notisia

TRABOUNAN DI MANTENSHON NA E “PARKEERPLAATS” DI COLON TA KLA

Geplaatst op 26 Novèmber 2017 dor di Ministerio di Tráfiko, Transporte i Planifikashon Urbano

Willemstad - Servisio pa Obra Públiko (OW) ta anunsiá ku trabounan di mantenshon na e lugá di stashoná outo na Colon ta kla. E trabounan a dura mas largu ku a premirá i OW ta pidi su diskulpa pa esaki. A enkontrá diferente kontratiempo durante ehekushon ku mester a adaptá e planifikashon original.

 

Atraves di e trabounan aki ta kumpli ku e petishon di shofùrnan di bus di moda ku nan por lora di un manera mas sigur dilanti di Colon, subi e lugá di stashoná outo i sali parti pabou i sigui nan destino.  

 

Pa e komersiantenan tambe e trabounan aki tin benefisio mirando ku ta hasi e aksesibilidat di kliente na e diferente espasionan den Colon mas fásil. Loke ta un balor agregá pa e komersiantenan. Durante di e trabounan, stashonamentu di outo por a tuma lugá normalmente pasombra no a sera e espasio kompleto. A sera un parti kaminda ta traha i despues ta sigui e di dos parti.

 

Aktualmente tin espasio pa algu mas ku 100 outo stashoná riba e tereno. E trabounan a enserá drecha e kaya entre santana Protestant i e edifisio ántes di Chephacu i hasi e kaya di dos direkshon pues por subi i sali for di e lugá di stashoná outo. A kita e asfalt bieu i kibra i pone nobo miéntras ku lo marka e lugánan di stashoná outo.

 

OW ta yama tur usuario di e área danki pa e pasenshi demonstrá durante di e trabounan aki. 

 

Ministerio konserní

Bo opinion