Notisia

TRAHANDO HUNTU SO, NOS POR LOGRA NOS METANAN

Geplaatst op 17 Yanüari 2019 dor di Ministerio di Hustisia

Den e promé siman di yanüari, Sentro di Detenshon i Korekshon Kòrsou (SDKK) a tene un seshon di habri aña, kaminda a para ketu na e desaroyonan ku e instituto a pasa aden den aña 2018 i e plannan pa 2019. Durante di e seshon aki, señor Urny Floran, direktor di SDKK a elaborá riba e puntonan fuerte di e sentro di detenshon i tambe e aspektonan ku ainda por mehorá. Tambe el a presentá plannan pa SDKK pa 2019. E punto ku mas señor Floran a enfatisá ta e bon trabou di e trahadónan di SDKK ku apesar di tur reto, semper a para kla i hasi nan esfuerso pa sirbi komunidat i en partikular e klientenan di e instituto.

Functieboek 2009 i reorganisashon
Durante di su diskurso, señor Floran a papia tambe tokante implementashon di Functieboek 2009. Den 2019 mester dal stapnan konkreto i asina kaba ku e trayekto di revishon, kaminda e personal ta bai traha konforme un organogram nobo ku deskripshon di funshon kompletu ku ta kuadra den e organisashon aktual. Di e forma aki kada miembro di personal lo sa presis kiko ta su tarea den e organisashon i kiko e organisashon ta spera di dje, sirbi pa un mihó funshonamentu di e organisashon i di e personal en partikular. Maneho di SDKK ta konfia ku den 2019 lo logra terminá e trayekto di reorganisashon aki. Tambe señor Floran a hasi un apelashon na tur trahadó pa komo organisashon nan uni forsa i enfoká bèk riba e plan di Mehorashon di SDKK di mas aña i ménos riba diferensianan di opinion.

Overtaim
Apesar ku den 2018, a kòrta den pago di overtaim loke na prinsipio a trese malkomprendementu serka sierto trahadó, trahadónan en general a kontinuá ku nan labornan i a mustra komprenshon pa e echo ku e desishon aki ta unu ku ta benefisioso pa entre otro nan salú, bida sosial i familiar.

Logronan den 2018
Naturalmente no ta reto so tabatin. Señor Floran a para ketu na vários logro di SDKK den 2018. Den 2018 e instituto a logra gana premio den área di resosialisashon, esta e ‘Social Innovation Award’. Un otro proyekto ku kua a dal stapnan grandi ta e proyekto di kosementu di unifòrm pa trahadónan di prizòn dor di detenidonan mes. Señor Floran a ekspresá su satisfakshon mirando ku apesar di tur reto, awe SDKK por mira bèk riba un proyekto eksitoso.
E departamentonan finansiero, di seguridat i di ‘Huistdienst’ a logra hopi, teniendo kuenta ku desafionan diario ku nan ta konfrontá. Maneho di prizòn a ekspresá su orguyo pa ku kada trahadó ku a kontribuí na e logronan aki.

Plannan pa 2019
Pa ku plannan pa aña 2019 pa SDKK e direktor a trese dilanti renobashon di kushina, ‘Security Building’ i transformashon di esaki den e di dos tayer di kosturera. Tambe lo kaba ku rekonstrukshon di ‘White House’, lo sigui ku e reparashon kontinuo di e sistema di kloaka na prizòn i lo drecha barak pa indokumentadonan. Lo formalisá IB, kaba drecha algun ‘Huisblok’ i drecha un área spesialmente pa resosialisashon i introdusí un sistema nobo pa planta fruta i bèrdura di forma moderno. E meta ta pa e promé kosecha di SDKK tuma lugá den luna di mart próksimo. Banda di esaki, meskos ku ta e kaso último añanan, konhuntamente ku Opleidingsinstituut Rechtshandhaving en Veiligheidszorg (ORV), SDKK lo sòru pa diferente kurso pa personal i introdusí instrumentonan pa drecha komunikashon interno ku e meta pa fortalesé e personal i informá trahadónan debidamente. Den 2019 tambe e aspekto di seguridat den prizòn tin tur atenshon di maneho di SDKK. Ta trata aki entre otro di kombatimentu di ‘drone’ ku ta bula riba e sentro di korekshon ku merkansia.

Resosialisashon
Un trayekto mas di resosialisashon ta pa den kuadro di aña di kai òrgel, traha un kantidat di ka’i òrgel riba petishon di Ministerio di Enseñansa, Kultura, Siensia i Deporte i CCC (Cultureel Centrum Curaçao). Di e forma aki tambe SDKK komo parti di Ministerio di Hustisia ta traha di forma integral huntu ku otro ministerio.

Sostené otro
Na final di su diskurso, señor Floran a invitá e personal pa pone man na obra i traha huntu pa duna mihó servisio i pa tur hende duna di nan parti pa e ambiente di trabou ta sano i bon pa un i tur. Floran: “Nos ta ban traha duru pa asina alkansá nos metanan i logra éksito den 2019. Ban sostené otro. Hasi bo máksimo esfuerso di forma ku nos tur huntu lo disfrutá di nos logronan durante di e aña 2019. Ban stimulá otro pa asina trese un kambio. Trahando huntu, so nos por logra nos metanan.”

Ministerio konserní

Bo opinion