Notisia

Tuma lei den bo mes man no ta alsa seguridat den tráfiko.

Geplaatst op 13 Sèptèmber 2019 dor di Ministerio di Tráfiko, Transporte i Planifikashon Urbano

Willemstad – Minister di Tráfiko, Transporte i Planifikashon Urbano, sra. Zita Jesus-Leito huntu ku Servisio pa Obra Públiko, OW ta informá komunidat pa no tuma niun desishon pa alsa seguridat di tráfiko riba propio inisiativa, manera aplikashon di un “zebrapad” riba kaminda.

Resientemente habitantenan di e bario di Roi Santo a tuma e desishon, riba nan propio inisiativa, di pinta un “zebrapad” riba un kaya den nan bario, eksaktamente na altura di un vèlt deportivo i un sentro di bario. Esaki supuestamente komo meta pa alsa e seguridat di e kaya i komo resultado baha e velosidat di e outomobilistanan, mirando e intensidat i velosidat di e tráfiko riba e kaya aki. Habitantenan di e bario tin komo argumento ku Gobièrnu di Kòrsou no a tuma akshon pa e kaya aki, i nan si lo logra nan meta.

Servisio pa Obra Públiko ta informá komunidat ku ponementu di “zebrapad” ta mara na nos Lei di Tráfiko, “WVVC2000” ku ta nifiká “WegenVerkeerVerordening Curaçao”. E Lei di tráfiko aki ta indiká ku no por pone “zebrapad” riba un kaya tanten ku no por garantisá ku 85% òf mas di e outomobilistanan ku ta pasa riba e kaminda ta kore ku un velosidat di 50 KM pa ora òf ménos. Lei di tráfiko ta indiká ku ademas di pone e “zebrapad” mester pone un bòrchi di ku ta indiká e outomobilista ku e ta na un “zebrapad” esaki ta pa valides di e lei.

Tambe ta importante pa pone un bòrchi di atvertensha pa e outomobilista ta konsiente ku nan ta aserkando un “zebrapad”. Den e bario di Roi Santu esaki no a tuma lugá konforme lei di tráfiko, i ta wòrdu konsiderá un akto ilegal.

Pa logra ku ta pone un “zebrapad”riba un kaya mester apliká un medida ku por kalma e tráfiko promé. Un di e medidanan pa kalma tráfiko i logra ku 85% òf mas di e outomobilistanan ku ta hasi uso di e kaya pasa ku un velosidat di 50KM òf ménos ta dor di pone un òf mas drèmpel riba e kaya.  Pa e motibu aki a laga kita e ferf for di kaminda.

Minister Jesus-Leito huntu ku Servisio pa Obra Públiko ta hasi un petishon na públiko ku ta deseá di alsa nan seguridat di tráfiko den nan bario, pa manda un karta ku nan petishon por eskrito na nòmber di hefe di servisio i entrega esaki na lanthùis Parera, ku ta fungi komo ofisina prinsipal di OW. Esaki no ta un garantia ku e kambio aki ta wòrdu ehekutá, pasobra manera a splika ariba mester analisá kada petishon a base di kriterianan di seguridat pa e peaton i o outomobilista.

Ministerio konserní

Bo opinion