Notisia

Un kuart (25%) di presupuesto disponibel di e kasnan di famia ta bai na gastu di bibienda

Geplaatst op 20 Novèmber 2018 dor di Ministerio di Maneho di Gobernashon, Planifikashon i Servisio Públiko

Ofisina Sentral di Statistik (CBS) ta publiká e resultadonan básiko di e enkuesta di presupuesto ku a tene na 2016. E resultadonan akí ta duna informashon riba gastu di konsumo di e kasnan di famia na Kòrsou, partí den diferente kategoria di konsumo, manera kuminda, bibienda, i transporte i komunikashon.  Informashon tokante gastu di konsumo ta importante pa por kalkulá inflashon i Índise di Preis pa Konsumidó (IPK). Pa kalkulá esakinan, CBS ta wak preis di un kantidat grandi di produkto i servisio ku ta den ‘makutu di konsumo’.

Makutu di konsumo ta un lista di produkto i servisio ku ta reflehá patronchi di konsumo di yu di Kòrsou. Ta aktualisá e lista akí regularmente (‘basisverlegging’) a base di e resultadonan di e enkuesta.

 E gráfiko ta mustra ku na Kòrsou, tur luna, un kuart di presupuesto disponibel di e kasnan di famia ta bai na gastu di bibienda (25%), prinsipalmente gastu di sea hipotek òf hür. Tambe e gráfiko ta mustra ku 13% di e presupuesto disponibel ta bai na transporte i kuido di salú, 12 porshento na kuminda i 11 porshento na artíkulo pa kas i muebel. E gastunan menshoná aki ta e gastunan prinsipal pagá for di un kas di famia su presupuesto disponibel. E gastunan mas chikitu ta paña i sapatu (10%), komunikashon (7%), kuido di salú, hotèl i restorant (2% respektivamente), gastu relashoná ku enseñansa (1%) i gastu di produkto ku tin akseins riba dje, manera bibida alkohóliko i produkto di tabako (1%).

 Den e tabèlnan publiká online, por mira kla kon e patronchi di gastu ta varia entre e gruponan ku diferente komposishon di kas di famia, entrada di kas di famia i nivel di enseñansa. Na su debido tempu lo publiká e resultadonan kompleto. Entre tantu, por haña e tabèlnan riba nos wèpsait bou di Statistics by Subject/Budget Expenditure Survey.

  

Ministerio konserní

Bo opinion