Notisia

. . . . update di trabounan i promé resultadonan riba e barku FREEWINDS relashoná ku kaso konfirmá di Sarampi.

Geplaatst op 7 Mei 2019 dor di Ministerio di Salubridat Públiko, Medio Ambiente i Naturalesa

Ministerio di Salubridat, Medio Ambiente i Naturalesa ta. . . .

 

. . . . update di trabounan i promé resultadonan riba e barku FREEWINDS relashoná ku kaso konfirmá di Sarampi.

Trabounan durante e bishita na e barku

Riba djasabra, 5 di mei, e barku FREEWINDS a drenta haf di Kòrsou. Tur aspekto di su yegada a ser kordiná entre Outoridatnan di Haf, agensia di barku, outoridatnan di imigrashon, douane i departamento di Epidemiologia pa asina mantené un kòntròl total riba e situashon. Durante henter djasabra departamento di Epidemiologia huntu ku departamento Malesanan Kontagioso a realisá entrevistanan serka e tripulante i e grupo di pasahero. E trabounan realisá tabata pa identifiká personanan ku ta kore riesgo, personanan vakuná kontra di sarampi i posibel kasonan nobo di sarampi.

Dòkternan di GGD ku a bai abordo a entrevistá i kombersá ku e pashènt diagnostiká ku sarampi pa evaluá su kondishon i konfirmá ku el a kura kompletamente i ku no tin ningun riesgo pa otronan. Huntu ku e dòkter di e barku tambe nan a tuma nota di e lugá di isolashon i a konfirmá ku durante e periodo di kontagio e persona tabata totalmente isolá. Esaki ta konfirmá tambe ku e chèns ku persona riba e barku òf bishitante di e barku di pega ku sarampi ta masha masha chikitu.

Na total a entrevistá 318 persona, 102 pasahero i 216 tripulante, esta tur hende na bordo inkluyendo e pashènt mes. E promé parti di e trabou, entrevistanan, a konkluí despues di 6’or di atardi.

A tuma e desishon tambe pa realisá análisis di laboratorio na RIVM na Hulanda pa identifiká di manera definitivo ken tin imunidat kontra sarampi. Profeshonalnan di ADC huntu ku 2 enfermero di  e departament di Malesanan Kontagioso  (GMN), a keda te lat anochi pa kue sanger di tur esnan nesesario.

Na total a kue sanger di 185 tripulante i 92 pasahero, e trabounan aki a dura di 4’or te 9.30 di anochi. Sobrá personanan, 31 tripulante i 10 pasahero, ku por a demostrá ku nan a risibí e vakuna kontra di sarampi i naturalmente e kaso mes ku a haña sarampi, no tabatin mester duna muestra di sanger.

Kontrali na lokual a sali den publisidat niun hende di e barku FREEWINDS no a baha for di e barku ainda. Pa kontrolá esaki mes tur kos a keda kordiná ku Outoridatnan di Haf manera a splika anteriormente.

Entretantu e muestranan di sanger a yega laboratorio RIVM. Ta spera e resultadonan pa mas tardá diahuebs awor. Una bes e resultadonan a drenta konhuntamente ku Organisashon Panamerikano di Salu (PAHO), e agensia di Salu Publiko di Caribe (CARPHA) i RIVM lo determina e siguiente pasonan.

Trabounan anterior na e bishita na e barku

For di djabièrnè 3 di mei te ku djaluna 6 di mei a logra entrevista 108 persona ku a bishitá e barku durante e periodo di 22 te 28 di aprel. Mayoria tabata personanan ku a reakshoná riba petishon di GGD pa tuma kontakto, otronan a ser identifiká for di listanan di organisadónan di e eventonan.

E intenshon ta pa monitoreá un grupito di esakinan pa wak si nan ta desaroyá síntomanan di sarampi, ounke ku e chèns pa esaki a sosodé ta masha chikitu.

Nos ta hasi un petishon pa hendenan ku no a tuma kontakto ku GGD ainda, hasi esaki mas pronto posibel yamando number 9345 òf 0800-0888. Si no logra kontakto por fabor sigui purba pasó tin hopi yamada ta keda drenta.

Ademas di esaki a soru pa tur pasaheronan ku a baha di barko prome ku 28 di aprel a wordu kontakta dor di e barko. Nos lo perkura pa e diferente departamentonan di salú den e paisnan konserní lo sigui monitoreá e grupo aki.

Ta pidi tur mayor pa sòru ku muchanan ta vakuná segun e skema di vakunashon di Departamento Salú Hubenil. Pa bo konfirmá ku bo yu(nan) a pasa e vakunanan konsulta e karchi di vakunashon.  Muchanan mas yòn ku 19 aña ku a pasa tur vakuna no ta kore ningun riesgo.

Si bo no sa bo status di vakunashon i bo no sa si bo a haña sarampi i bo tin entre 19 i 50 aña lo bo por risibí e vakuná na Ofisina di Vakunashon pa Adulto di GGD na Zakitó. Por bèl e Enfermera pa splikashon òf un afsprak na telefòn 432-2860. Si no haña kontesta por laga fam i number di telefòn den e mashin di kontestá i lo tuma kontakto ku bo.

Síntomanan di sarampi ta:

Keintura haltu ku ta kuminsá direpente, tosamentu, nanishi ta kore, wowo kòrá ku ta kore awa. Tres pa sinku dia despues di a kuminsá bira malu e persona ta haña iritashon di kueru (rash, uitslag) ku ta kuminsá aparesé na e rant di kabei, despues sigui na kara, despues kurpa, i te delaster man ku pia.  

Ministerio konserní

Bo opinion