Notisia

VVRP ta distansia su mes for di ekspreshonnan hasí pa empleado di Servisio pa Obranan Públiko (OW)

Geplaatst op 3 Òktober 2019 dor di Ministerio di Tráfiko, Transporte i Planifikashon Urbano

Willemstad - Ministerio di Tráfiko, Transporte i Planifikashon Urbano (VVRP) a tuma nota ku resientemente un empleado di OW bou di ora di trabou a duna un deklarashon na un radio lokal.

Ministerio di VVRP ta anunsiá ku únikamente Minister di e Ministerio, i/òf e bosero ofishal i/òf un empleado públiko apuntá por papia na nòmber di e Ministerio di VVRP den prensa. E empleado públiko di OW  a ekspresá su mes na radio riba tópiko di Ministerio sin outorisashon di Minister di VVRP.

Ministerio di VVRP ta informá ku Sr. Felip Guanipa ku ta fungi komo bosero di OW,  Sr. Dwigno Puriel, komo direktor interino di OW i/òf Minister Zita Jesus Leito, Minister di e Ministerio di VVRP por duna entrevista i vosiferá opinion di Ministerio di VVRP den prensa.

Gobièrnu tin un kódigo di kondukta ku ta konta pa tur empleado den e aparato públiko i tambe pa tur ámtenar, empleado públiko. Ekspreshonnan manera hasi resientemente na radio ta kontra e reglanan di kondukta ku ta konta pa tur empleado públiko i lo atendé ku tur empleado konforme e lei ku ta rigi funshonamentu di e kuerpo di empleado públiko.

Komo ku e ekspreshonnan hasi na radio por keda konsidera komo ekspreshonan di e Ministerio, Ministerio ta tuma distansia di esakinan.

 

 

 

 

Ministerio konserní

Bo opinion