Notisia

PÈRMIT RELASHONÁ KU VÜRWÈRK

Geplaatst op 6 Novèmber 2017 dor di Ministerio di Hustisia

Minister di Hustisia  konhuntamente ku Minister di Tráfiko, Transporte i Planifikashon Urbano di Pais Kòrsou ke trese na konosementu di interesadonan:

 1.          ku pa importashon di vürwèrk for di eksterior mester di un pèrmit di importashon di Kapitan di Haf, ku ta optenibel na su ofisina;

 2.          pa almasená e vürwèrk importá den “Kruithuis” mester hasi un petishon riba un formulario espesial pa esaki, optenibel na Obranan Públiko (O.W.)(na e departamento “Inkoop & Magazijnen”;

 3.          ku e vürwèrk importá mester ta segun e reglanan stipulá den kartanan di dia 5 di yüni 1996 i 9 di sèptèmber 1997 di Minister di Hustisia dirigí na tur importadó di vürwèrk segun “Eilandsbesluit Ontplofbare Stoffen Curaçao” A.B. 1963 # 33 Art. 5 insiso 1 i 2;

 4.          ku pa transportá vürwèrk riba karetera públiko mester di dos pèrmit, un pèrmit di transporte di Kapitan di Haf pa “Kruithuis” i un pèrmit di transporte di Obranan Públiko (O.W.) for di “Kruithuis” pa lugánan di benta ku ta optenibel respektivamente serka Kapitan di Haf i departamento “Inkoop & Magazijnen” di O.W.;

 5.          ku transporte di vürwèrk por tuma lugá solamente den vehíkulo ku ta di kùr espesialmente pa tal transporte; E petishon pa kùr e vehíkulonan mester ta entregá na Ofisina di Kapitan di Haf;

 6.          ku petishon pa haña pèrmit di benta i almasená vürwèrk durante kambio di aña 2017/2018 mester ta entregá promé ku dia 8 di novèmber 2017 riba un formulario espesial ku ta optenibel na Obra Públiko (O.W.) departamento: “Inkoop & Magazijnen”;

7.          kada persona ku hasi petishon pa haña pèrmit di benta I almasená vürwèrk durante kambio di aña 2017/2018 mester entrega papel di kámara di komersio (KVK) I tambe su cribnummer huntu ku e formulario di pèrmit optenibel na OW;

8.          ku tur e petishonnan i pèrmitnan menshoná di akuerdo ku Lei riba Seyo (zegelverordening) 1908 (A.B. 1992 no. 20) manera adaptá, ta suheto na “belasting” di Seyo;

9.          ku pa haña pèrmit pa tene shou di pagara riba kaminda públiko, mester hasi petishon na Ofisina di Polis na Rio Canario por lo ménos tres siman promé ku esaki tuma lugá i tambe mester notifiká Brantwer i Obranan Públiko;

10.      Pèrmit di vürwèrk pa bende na públiko ta wòrdu hasi i tambe entrega pa e mesun persona ku ta responsabel pa e punto di benta. Pues kada pèrmit ta wòrdu hasi individual;

11.      Brantwer Kòrsou ta bai kontrolá e adrès i tambe establesimentu di benta/ kònteiner di e petishon di pèrmit. E adrès i tambe establesimentu konforme e petishon pa benta di vürwèrk, mester kuadra ku tur regla di lei, pa por bini na remarke pa un pèrmit;

12.      promé ku un persona risibí su pèrmit e ta obligá pa asistí na un di e dia nan di informashon organisá pa Brantwer Kòrsou;

13.      na momento ku Brantwer, Obra Públiko i departamento di Medio Ambiente ta bai tèst e vürwèrk e importadó mester ta presente. Kada importadó ta responsabel di apuntá un òf mas persona pa saka e vürwèrk un pa un i sende e vürwèrk ora Brantwer indiká esaki;

14.      Brantwer Kòrsou ta eksigí pa tèst un di kada modèl di vürwèrk ku e importadó a importá;

15.      vürwèrk Supermarket NO ta aseptabel;

16.      na kada establesimentu di benta/ kònteiner e bendedó mester kumpli ku e reglanan vigente. Un muestra di kada modèl pa mustra na e públiko, sobra vürwèrk mester ta warda den un drùms òf kònteiner aprobá dor di Brantwer Kòrsou;

17.      vürwèrk mester ta wardá konforme e eksigensianan di Brantwer Kòrsou.

 

               Minister di Hustisia menshoná

               Mr. Quincy C.O. Girigorie.

Ministerio konserní

Bo opinion